علاج التنمر بالتنمر

شي مرة حاول حدا من محيطك يدافع عنك ويواسيك بعد تعرضك للتنمر، ولكن بعد  دقائق بتكتشف أنه فقط كان عم يعالج "التنمر بتنمر" أكبر منه ؟!بمجتمعنا منتّبع هالأسلوب من قديم الزمان؛ بحجة المزح، النصح، أو الدفاع عن النفس، ولكن أساليب علاج التنمر الخاطئة عم تتورث من جيل لجيل من دون ما نقصد.. كيف؟-كثير من الأحيان بكون رد الأمثل على الإساءة هو السكوت، لكن بعض الناس بتلجأ لرد بإساءة مماثلة من مبدأ "الجزاء من جنس العمل" .. اللي ممكن يُستهزء فيه بمظهر، لباس، شكل، أو حتى لهجة الشخص المسيء، تحت بند "إنت بلشت بالأول" ..

أو أساليب الدفاع والمواساة من قبيل؛ -لا تتنمر عليه ما بتخاف تصير متلو !-عم يتنمر عطولك؟ مو شايف شكله عالمراية ؟- أبو أربع عيون وعم يحكي عالعالم؟

وأساليب النصائح الكارثية القائمة على التنمر غير المقصود، اللي معظم الأوقات بيتبعها الأهل للاسف، متل:- شدي ظهرك، ليك كيف صايرلك حدبة.- حاج تأتأة ما عم افهم عليك.- لسا نظارتك سمك الفنجان وليل نهار عالموبايل.- كرمال مستقبلك دروس وشد حيلك، احسن ما تضلك راسب وفاشل- لا تلعب بالحبوب بوشك مو شايف شكلك كيف صاير.منفكر للأسف إنها جمل تحفيزية من باب النصح والخوف؛ ولتحمي الشخص من سخرية أو تنمر الآخر، ولكنها حقيقةً هي أخطر من التنمر المباشر بتحمل بأعماقها ندبات عميقة، خصوصي لما تصدر من القراب..وهون المشكلة؛ معظم الاشخاص بكون هدفها وقف التنمر، لكن بأسلوب غير واعي فاقم المشكلة، وعزز ثقافة التنمر والمخزون الذهني واللغوي السلبي بعقل الشخص.

طيب .. والحل!؟بعض الخطوات البسيطة، بتساعدنا نحمي أنفسنا والآخرين:-حاول تبدأ بنفسك وتكون قدوة لغيرك، تكون رضيان عن نفسك وواثق بحالك لما يهزك الكلام المُسيء، واحرص على انتقاء كلماتك عند النصح أو مواساة الغير.-لما حدا يشكيلك، كون مستمع جيد حاول ساعده توصل لحل للمشكلة، أو يتخلص من اللي زاعجه بدون توجيه إساءة مضاعفة للشخص اللي زعجه بالأساس.-انتبه كتير منيح لكلامك اللي بتوجه للغير، والأمثلة اللي بتطرحها وخاصة للطفل على إنه "نصيحة" أو من باب الخوف، لأن ممكن الأثر الجارح المتضمن بالنصيحة يضل ندبة بداخله وتكون ردة فعله عكسية تجاه النصيحة.

-لا تستخدم أبداً المظهر/الشكل/اللباس/اللون/الأمراض والإعاقات الجسدية أو النفسية وغيرها كأسلوب لرد الاساءة وإيقاف المتنمر عند حده.-والأكيد، لا تسكت عن حقك دافع عنه وما ترضى بالاساءة لكن بالمنطق والعقل ورد على مضمون الإساءة بذاتها؛ وليس مضمون صاحبها.

بالنهاية، رد التنمر بالتنمر هيي عادة عند المعظم بيتبعها بدون إدراك أو قصد ولكن من باب الدفاع عن النفس..بس بالحقيقة الشخص القوي، الواثق من نفسه هوي الحكيماللي بيقدر يطفي النار بالمنطق بدل ما يشعلها زيادة ..واتذكر دائماً مهما إزدادات الخيارات والأساليب؛ اختر أن تكون لطيفاً، فاللطف هو القوة .. والقوة هي اللطف!